餵母乳係一件點既事？ 有d媽媽比較暢順，有d媽媽比較困難。我唔係超困難，但都唔容易。 . 因為bb早產，一生世無得即刻見同抱，無咗好關鍵既肌膚相親，bb就入去深切治療部，跟住bb又住18日醫院，所以我難d分泌愛的荷爾蒙（催產素），難d持續上奶。 . 到bb出院，因為佢吸啜力未夠，又慣左用奶樽，開頭成日推開我，唔肯埋身啜。bb無情但唔係有心既拒絕，作為媽媽，我都會傷心，唯有泵奶俾佢。 . 試過泵奶泵成45分鐘，都係得10ml（果時bb需求量已經去到100ml)，會好攰同好挫敗。 . 到佢終於肯埋身啜，又要食成個半鐘，人都虛脫了。 . 後來縮減到45分鐘一次，佢又唔夠飽喊到拆天，埋身食完又要再補餵奶樽，身心都會好累。氣都未回，好快又要食下一餐。 . 到近來佢終於可以食45分鐘夠飽，食完會滿足會笑。由每2，3小時到隔3，4小時食一次奶，輕鬆返dd了 =） . 有時好攰想唔餵人奶skip 1,2餐抖下，用奶樽餵， 點知就塞奶谷奶，同有小白點，超痛。 試過一路餵，我一路流左幾滴眼淚，唔止因為痛，而係當中既挫敗，疲累，沮喪，矛盾。 我中間有無數次想放棄餵人奶。 . 【呢2個月係點堅持？】 諗起bb咁努力去吸啜， 咁努力去進步， 好穩定咁長肉， 媽媽我都被鼓勵， 想努力試多陣。 . 吸啜母乳真係bb天生既本能， 只要將bb放近胸前，bb就識得頭擰擰，爬去尋乳。 所以，我想順著bb天生本能去餵佢。 . 加上bb出世時呼吸同吸啜都唔太理想，想藉埋身餵強化佢呢2方面～母乳亦可以俾到天然抗體bb，令佢健康d~同埋想俾多d肌膚相親既溫暖，安全感俾佢～ . 再加上好多人都話捱過頭果段時間，之後順暢左餵人奶反而更方便快捷，我就望住呢個希望黎堅持落去啦～ . 試下試下就試左2個月。 唔知可以喺餵人奶之路同bb行到幾遠，但做到頭兩個月，見到bb健健康康，肥肥白白，已經好好了。 . 同時，都體會到餵母乳係有機會餵到產後抑鬱～ 所以各位媽媽，要衡量一下邊種方法對自己同bb最好（餵奶粉／餵人奶／混合2種）。無一個最好既方法，只有最適合你既方法～ happy mum 會有 happy baby啊~ . 生咗bb後，對於做媽媽呢個角色多左好多體會，好想好好記錄同沉澱，以致未來可以比以前更貼近到有情緒困擾既媽媽clients，做到更深既同理，更溫暖既陪伴。 . 篇文咁長，相信無咩人會睇到最後，若果有既，多謝你
